Filtrer på tags

Artistane er klare til Blest Festival!

Artistane er klare til Blest Festival!

Få med deg morgondagens superstjerner frå Sogn og Fjordane på Blest Festival!

Fredag 18. januar kl. 20.00 – 01.00
Vi viser fram nye og aktuelle artistar frå Sogn og Fjordane.

Sjekk ut banda som spelar på Blest på Brak si speleliste Blest 2019 på Spotify

 

MAIH
MAIH slapp sin fantastiske debutsingel “Habits” den 19.oktober. Inspirert av artistar som Emilie Nicolas, Highasakite og Susanne Sundfør, klarar bergensbaserte MAIH å ta lyttaren med i nye musikalske retningar og å skape storslått elektronisk pop. Martine Håland har allereie blitt samanlikna med både Sigrid og Aurora. Vi spår at MAIH blir å sjå på alle festivalscener i åra som kjem. Sjå ho først på Blest!

Kaia Höl
Kaia Høl Fredheim er ein produsent og låtskrivar inspirert av artistar som Lana del Rey, Susanne Sundfør og MØ. Sidan tenåra har ho produsert musikk på MIDI-softsynthar og Logic. Ho eksperimenterer med eit vidt spekter av lydar og metodar for komponering, men er heilt sjølvlært og komponerer på gehør. Kaia har gitt ut fire singlar i løpet av hausten og er ein av dei mest spennande nye artistane frå Sogn og Fjordane i 2018.

Detroit Sound
Med føtene planta breibeint i midtvestens 70-talls psychpunk og garasjerock skrur Detroit Sound fuzzpedalen på max og leverer skitne riff med harde lyriske budskap. Bandet har til tross for si korte karriere (sidan våren 2018), gitt ut to fullengdarar og en EP, tettpakka med klassisk punkrock. Diggar du MC5, The Stooges, New York Dolls og The Sonics, så diggar du Detroit Sound!

Elida Høgalmen
Elida lagar ærleg og melankolsk stemningsmusikk gjennom klangfull vokal, svevande gitarar, orgel og dissonerende vokalloops. I det fjerne kan ein høyre element som vitnar om inspirasjon frå både folkemusikk, jazz og sakral musikk. Elida Høgalmen slapp i haust debut-EPen Past som fekk full pott og seks hjarter i Bergens Tidende. Med fullt band på scena på Blest blir dette noko av det finaste du høyrer i år.

V I L N E S
Mannen bak artistnamnet V I L N E S er songar, hitmakar og showman Eivind Vilnes. Han skriv fengjande låtar i bøtter og spann. Den engelske musikkbloggen Nordic Music Review omtalte hans første låt Demons som “this really is 2 minutes and 40 seconds of indie pop genius”.

Falkevik
Falkevik er ein trio med Julie Falkevik Tungevåg i spissen. Med mot, kreativitet og kjærleik for improvisasjon  kombinerer trioen det kalde, nordiske jazz-uttrykket med elegante og rare popmelodiar. Falkevik slapp debutplata si Louder than I’m used to i oktober og fekk terningkast 5 både i Dagsavisa og Aftenposten.

Jackbow
Jackbow er eit hardtarbeidande rockeband frå Nordfjordeid. Bandet har gitt ut to singlar og har fleire på trappene i 2019. I 2018 har Jackbow blant anna varma opp for Oslo Ess og spelt for fulle hus på Malakoff. Bandet leverer eit høgenergisk sceneshow og skapar ei spesiell atmosfære på konsertane sine. Dette vil de ikkje gå glipp av!

 

LUTTPRISEN

Laurdag 19. januar kl. 20.00 – 21.00
NRK Sogn og Fjordane deler ut Luttprisen i forbindelse med Blest 2019. Luttprisen oppsummerer musikkåret 2018 og fleire av årets viktigaste artistar blir og sjå på scena. Det blir eit forrykande show på Larris scene som også skal sendast LIVE på radio. Konferaniser: Ronny Brede Aase

SJUR
Sjur Gimmestad slapp sin første singel på Spotify i 2016 under artistnamnet SJUR. Sidan då har han hatt over 150 millionar avspelingar berre på Spotify og har samarbeida med artistar som Pitbull og Isac Elliot. I 2018 har han turnert land og strand og spelt dei store festivalane og mellom anna på Rådhusplassen for 70 000 tilskodarar.  SJUR lagar eit heidundrande show og blir heilt fortjent ofte samanlikna med KYGO!

Thea Hjelmeland
Thea slapp hausten 2018 sitt tredje album KULLA til fantastisk mottaking frå eit samla pressekorps. Med sitt gripande scenetekke og sterke låtar fangar ho publikum i si hule hand. Thea Hjelmeland har tidlegare mottatt både Luttprisen og Spelemannsprisen. Endelig ser vi Førde si eiga superstjerne på Luttprisutdelinga på heimebane.

Line Dybedal
Line syng på klingane seljedialekt og har hyppig rotasjon på nasjonale radiokanalar. I 2018 har ho skrive og gitt ut soundtracket til barne-tv serien Bli med heim som vart sendt på NRK1 tidlegare i år. Line er i gang med nytt album som etter planen kjem ut i 2019.

Aleks Grey
Aleksander Raftevold frå Heggjabygda i Eid kommune har i 2018 gått i samarbeid med Toothfairy Label & Management og gitt ut to sterke singlar; Let Go og Stay. Aleks Grey har i 2018 spelt både på Bylarm og på Malakoff som gjesteartist med SJUR. På Luttprisen tek dei opp att det fabelaktige samarbeidet på Larris scene.

SOFIA
Sofia Hyttedalen er ein produsent, låtskrivar og artist frå Sandane. Sofia vann årets nykommer på Blest 2018 og i år står ho på scena under Luttprisen saman men SJUR og Aleks Grey. SOFIA har gitt ut to knallgode singlar i 2018 og har mellom anna spelt på Malakoff rockfestival. Vi spår ei lysande framtid for denne unge karismatiske multikunstnaren!

Odd-Erik Lothe
Frontfiguren i Fabel er endelig tilbake! Nære og varme tekstar, herlig melodiføring og det kjente og kjære soundet gir oss ein etterlengta sommarflørt denne januarkvelden. Odd-Erik har i 2018 oppsummert ei lang og flott karriere med samleplata «Songar.»  Til Luttprisen kjem han også med splitter ny musikk.

Frida Hunshammer
Frida Hunshammer frå Årdal fekk nasjonal merksemd då ho var med på The Voice i 2017. I 2018 har ho jobba med eigne låtar og gitt ut to sterke singlar. Ho har også kome igang med eigne konsertar og har blant anna spelt på Målrock i Årdal og Jordeplerock i Lærdal. Laurdag 19. januar står ho på scena på Luttprisen

Konsert: 22.00: TBA

Etter Luttprisen fortsetter vi å feire musikklivet i Sogn og Fjordane ut i dei små timar. 

Blest er Sogn og Fjordane sin eigen bransjefestival som går av stabelen 18. – 19. januar 2019 i Førde. 18. januar fyller vi Larris med musikk frå Sogn og Fjordane. 19. januar er det konferanse og Luttprisen. Skal du delta på konferansen? Les meir og meld deg på som delegat her: http://www.brak.no/hendelse/blest-2019/

 

Siste nytt